أختي العزيزة لو ربنا فك عقدتك واتخطبتي(ربنا كبير ) فإليك نصائحي حتى تأخذي بخطيبك من مركب الخطوبة إلى مثوااااه الأخير في قفص النسانيس قصدي.. قفص الزوجية السعيد
أجمل ما في الخطوبة العزومات الرومانسية على أحلى محلات أكل فى البلد (ده لو هو واد فييس زى انا كده ... -كنتاكى -كوك دور- بيتزا 7 دايز .. يا بختها بيا طبعا
انما لو معفن واخره يعزمك فى زيزينا بتاع المحطه او رزق بتاع الفول يبقى كبرى دماغك من الاول)
المهم عند أي عزومة مع خطيبك
1- الشوكه والسكينة
الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا م البوز زي الخنجر ولا من فوق طبعًا
2- العيش
العيش أوعي تفضحينا وتقطعيه بسنانك ولا الرغيف نصين بأيدك وكل نص لقمة وتحشري أوعي العيش بيتقطع بالسكينة فى الطبق وبعدين تاخدي لقمة لقمة بالعافية قال يعني نفسك مسدودة اضغطي على أعصابك جدااا وبعدين لما تروَّحي إبقي حِفِّي زي مانتِ عايزه
3- الشوووربة
بند الشوربة ده مهم جدًاااا أبوس رجلك الشوربة تتشرب من غير صوت خالص ومن غير ماتقعدي تنفخي فيها زى القهوجى اللى بينفخ فى حجر للزبون وطبعــاً عايزك تنسى تمامًاالسلطانية اللي بتقيميها على بقك ف البيت وتدلقي على روحك بالمعلقه وبدون صوت سخنة ولعة برضه بدون صوت وتسيبي تلت الطبق ع الأقل مش تميليه عشان تلهطيها لآخر نقطة
الاسباكتي برضه بالشوكة تتلف على طرف الشوكة لحد ما تخلص وبعدين تحطيها فى بؤك من سكات مش تشفطي المكرونة عود عود
6- السمك
مشكلة شوفي بتفصلي اللحم عن الشوك ..إزاي؟؟ تقطعي اللحم من النص بالطول وبعدين تفردي اللحم ع الجانبين ولما تخلصي ناحية متقلبيش السمكة.. بلاش فلح شيلي السلسلة بالشوكة والسكينة وحطيها ف جنب الطبق وكملي أكل النص التاني وبدل الفيلم الهندي ده نصيحة ماتكليش السمك خالص قولي مابحبش السمك وخلصي نفسك
7- الجمبري
إذا كنتي عارفاه أول ماطبق الجمبري ينزل.. بصيله بقرف واحتقار شديدين آل يعني زهقانة من كتر أكل الجمبري الجامبو ف بيت بابـا وأتنهدي جامد وقولي.. برضه؟؟؟ وتروحي قاطعة راس الجمبرياية بالشوكة أنا فى عرضك إنسي المصمصة دلوقتى
8- البطاطس
سواء مسلوقة أو محمرة أوعي تهرسيها وتدبيها على الرز وتدي لا..لآ...لآ بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي
9- الفاكهة
لو الفاكهة فيها بذر.. طلعيه من بؤك بالراحة وحطيه فى إيدك وهي مقفولة وبعدين فى طفاية السجاير اللي على الترابيزه أوعي ياحبيبتي من نظام التفتفة للبذر إنسي
10- لما تخلصي
ولما تخلصي أكل تحطي إيدك على بطنك اللي عصافيرها بتصوصو من العينات اللي كلتيها.. وتقولي له مش ممكن أنا عمري ما اتفجعت كدة أنا أودامي أسبوعل هابطل أكل فيه وبعدين تمسكي الفوطة اللي دايمًا موجودة على التربيزة من غير لازمة وتبوسيها آل يعني بتمسحي بؤك وبعدين تستأذني منه لدخول التوليت لإصلاح ماكياجك وتخشي التواليت وتطلعي من شنطة إيديك لفة الفول والطعمية اللي جايباها معاكي وبالهنا والشفـــاء
just 4 jesus عضو جديد
عدد الرسائل : 17 العمر : 36 تاريخ التسجيل : 25/06/2008
فعلا انا شايفة ان عقدتك كبيرة جدا و صعب انها تتفك غير بمعجزة اولا انا مش عايزة اتكلم باسلوب يبين اني بدافع عن البنات لان الدفاع معناه انهم في موقف ضعف الكلام ده بقي يا دكتور admin مبيحصلش غير لو كانت البنت جاية من الحارة مثلا وفي الحالة دي هيكون خطيبها من نفس مستواها يعني مش هتحتاج انها تمثل عليه وموضوع بقي شرب الشوربة بصوت ده اصلا من عوايد الرجالة الشوكة بقي والسكينة ده اصلا البنات هي اللي المفروض تعلمه للولاد عشان البنات المفروض انها رقيقة بس دي طبعا حاجة انت مبتقتنعش بيها مع اني عمري ما سمعت ان الرقة من صفات الولاد حتي لو كان كلام هظار الولاد المفروض من اهم صفاتهم الخشونة مش الرقة! صحيح في بنات كتير بتصتنع الرقة بس مش بالطريقة اللي انت بتتكلم بيها طريقتك بتوضح ان في عقدة جامدة جدا زي ما حضرتك بتقول متزعلش من صراحتي لانك طبعا اكتر واحد بتتكلم بصراحة وشكرا
jesus love Me عضو مميز
عدد الرسائل : 139 العمر : 35 تاريخ التسجيل : 06/02/2008
2008-06-18, 9:51 pm
. -كنتاكى -كوك دور- بيتزا 7 دايز
فعلا انا شايفة ان عقدتك كبيرة جدا و صعب انها تتفك غير بمعجزة
